ՀՀ վարչապետ Նիկոլ Փաշինյանը սրտանց շնորհավորել է Պետեր Մադյարին և հունգարացի ժողովրդին Հունգարիայի խորհրդարանական ընտրություններում տարած հաղթանակի կապակցությամբ։
Ըստ ապրիլի 12-ին կայացած ընտրությունների նախնական արդյունքների՝ ընդդիմադիր «Տիսա» կուսակցության ղեկավար Պետեր Մադյարի կուսակցությունը ոչ միայն հաղթանակ է տարել, այլև, ամենայն հավանականությամբ, ստանալու է խորհրդարանում սահմանադրական մեծամասնություն։ Ընտրություններում 199 մանդատից «Տիսա» կուսակցությանը բաժին է հասնում 138-ը։
Այս ընտրություններում 16 տարի անընդմեջ իշխանության գլխին գտնվող վարչապետ Վիկտոր Օրբանի կառավարող «Ֆիդես» կուսակցությունը պարտություն է կրել և կանգնելու է ընդդիմության դերում։ Ընտրությունները տեղի են ունեցել ինչպես կուսակցական ցուցակներով, այնպես էլ միամանդատ ընտրատարածքներով։ Քվեաթերթիկների մշակման գրեթե 99 տոկոսի ավարտից հետո «Ֆիդես» կուսակցությանը բաժին է հասնում 55 մանդատ, իսկ ծայրահեղ աջակողմյան «Մեր հայրենիք» (Mi Hazank) կուսակցությունը՝ 6 մանդատ։
Վիկտոր Օրբանը, չսպասելով ձայների վերջնական հաշվարկին, արդեն հայտարարել է, որ շնորհավորել է Պետեր Մադյարին և ընդգծել, որ «Ֆիդեսը» կծառայի Հունգարիային՝ որպես ընդդիմություն։
