ՀՀ վարչապետ Նիկոլ Փաշինյանը ընդունել է Էստոնիայի արտաքին գործերի նախարար Մարգուս Ցահքնայի գլխավորած պատվիրակությանը։
Ընդունման ընթացքում վարչապետը կարևորել է Հայաստան–Էստոնիա երկկողմ բազմաոլորտ համագործակցությունը՝ նշելով, որ վերջին շրջանում երկու երկրների միջև հարաբերությունները զարգանում են ինտենսիվ տեմպերով։ Այս զարգացման վկայությունն են նաև երկու երկրների բարձր պաշտոնատար անձանց փոխայցելությունները, որոնք, ըստ վարչապետի, նոր ազդակ են հաղորդում երկկողմ կապերի ընդլայնմանը տարբեր ոլորտներում։
Նիկոլ Փաշինյանը նաև կարևորել է Էստոնիայի դերը Հայաստան–Եվրոպական միություն համագործակցության զարգացման գործում, ինչպես նաև մեր երկրում ժողովրդավարական բարեփոխումների արդյունավետ իրականացմանը նպաստելու հնարավորությունների տեսանկյունից։
Իր հերթին, Էստոնիայի արտաքին գործերի նախարար Մարգուս Ցահքնան ընդգծել է Հայաստանի հետ համագործակցությունը խորացնելու հարցում իր երկրի շահագրգռվածությունը։ Նա նշել է, որ Էստոնիան պատրաստ է շարունակելու օժանդակել ՀՀ կառավարության բարեփոխումների օրակարգն առաջ մղելուն և նպաստել Հայաստան–ԵՄ փոխգործակցության խթանմանը։ Ցահքնան կարևորել է Երևանում Եվրոպական քաղաքական համայնքի գագաթնաժողովի անցկացումը՝ հավատարմորեն համոզմունք հայտնելով, որ այն կանցկացվի բարձր մակարդակով։
Հանդիպման ընթացքում երկու պաշտոնատար անձանց միջև տեղի է ունեցել մտքերի փոխանակում տարածաշրջանային զարգացումների, Հայաստան–ԵՄ համագործակցության օրակարգի, վիզաների ազատականացման գործընթացի և այլ հարցերի շուրջ։
