«Մեր ապագան» կրթամշակութային բարեգործական հիմնադրամը Հայաստանում հաջողությամբ իրականացրել է միջոցառումների շարք՝ նվիրված ԽՍՀՄ ատոմային առողջապահության համակարգի հիմնադիրներից մեկի և ճառագայթային անվտանգության կայացման գործում առանցքային դեր ունեցող գիտնական Ավետիք Իգնատի Բուռնազյանի ծննդյան 120-ամյակին:
Միջոցառումներն իրենց հերթին համախմբեցին Հայաստանի և Ռուսաստանի գիտական, բժշկական և դիվանագիտական հանրության առաջատար ներկայացուցիչներին՝ վերահաստատելով Բուռնազյանի ժառանգության անհրաժեշտությունը որպես հումանիտար և մասնագիտական փոխգործակցության կարևոր հիմնաքար:
Հոբելյանական ծրագիրը իրականացվել է երկու հիմնական փուլով: Առաջինը «Ավետիք Բուռնազյան – 120 տարի. ժառանգություն, որը միավորում է Ռուսաստանն ու Հայաստանը» խորագրով կազմակերպված ցուցահանդեսն էր: Այնտեղ ներկայացված էին արխիվային փաստաթղթեր, հազվագյուտ լուսանկարներ և այլ նյութեր, որոնք հավաքագրվել էին ռուսական և հայկական աղբյուրներից: Այս նյութերը համապարփակ պատկերացում էին տալիս գիտնականի անգնահատելի ավանդի մասին «ատոմային առողջապահության» համակարգի ստեղծման գործում:
Ցուցահանդեսին հետևեց գիտական կոնֆերանս, որի ընթացքում մասնակիցները քննարկեցին ճառագայթային բժշկության զարգացման, միջուկային անվտանգության և միջազգային գիտական համագործակցության առջև ծառացած արդի հարցերը:
Ծրագրի բացման ժամանակ «Մեր ապագան» հիմնադրամի գլխավոր տնօրեն Վահրամ Կարապետյանը նշեց, որ հիմնադրամի համար մեծ պատիվ է նվիրել իրենց ուշադրությունը նման հզոր ժառանգությանը: Նա ընդգծեց, որ միջոցառումների անցկացումը հենց գիտնականի հայրենիքում՝ Հայաստանում, կատարվածին հաղորդում է առանձնահատուկ նշանակություն:
ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը շեշտեց Ավետիք Իգնատևիչի անգնահատելի ավանդը հայրենական և համաշխարհային ճառագայթային բժշկության և անվտանգության կայացման և զարգացման գործում:
ՀՀ Գիտությունների ազգային ակադեմիայի նախագահ Աշոտ Սաղյանը մաղթեց մասնակիցներին արդյունավետ աշխատանք և նշեց, որ նման հոբելյանական միջոցառումներն անհրաժեշտ են գիտության և բժշկության զարգացման համար:
ՌԴ առողջապահության նախարար Միխայիլ Մուրաշկոյի պաշտոնական ուղերձը կարդաց Ա. Ֆ. Ցիբայի անվան բժշկական ռադիոլոգիական գիտական կենտրոնի տնօրեն, ՌԳԱ թղթակից անդամ պրոֆեսոր Սերգեյ Իվանովը: Նրա խոսքով՝ Ավետիք Բուռնազյանի անունը անխզելիորեն կապված է ԽՍՀՄ ռազմաբժշկական ծառայության, ճառագայթային և տիեզերական բժշկության զարգացման հետ:
«Արաբկիր» բժշկական համալիրի տնօրենների խորհրդի նախագահ պրոֆեսոր Արա Բաբլոյանը նշեց, որ գիտնականի կյանքի ուղին պրոֆեսիոնալիզմի և նվիրումի օրինակ է, իսկ նրա ժառանգությունը շարունակում է ուղենիշ լինել բժշկական հանրության համար:
Բացի այդ, կոնֆերանսի ընթացքում հանդես եկան ճառագայթային բժշկության և գիտության ոլորտի առաջատար մասնագետներ, ինչպիսիք են ՌԳԱ ակադեմիկոս Իգոր Ուշակովը, ով իր զեկույցում անդրադարձավ գիտնականի դերին միջուկային-տիեզերական բժշկության զարգացման գործում, և ՀՀ ԳԱԱ Բնական գիտությունների բաժանմունքի ակադեմիկոս-քարտուղար Ռուբեն Հարությունյանը, ով խոսեց հայ մասնագետների մասնակցության մասին Չեռնոբիլի վթարի հետևանքների վերացման աշխատանքներին:
Ծրագրի շրջանակում ելույթ ունեցավ նաև Ավետիք Բուռնազյանի ազգականը՝ Հակոբ Թերզյանը, ով հուշերի միջոցով լրացրեց գիտնականի և պետական գործչի կերպարը:
Միջոցառումներն անցկացվեցին Հայաստանի Հանրապետությունում Ռուսաստանի Դաշնության դեսպանության և ՀՀ Գիտությունների ազգային ակադեմիայի աջակցությամբ:
