Երևանում տեղի է ունեցել Հայրենական մեծ պատերազմի 104-ամյա վետերան Հրանտ Մելիքսեթովիչ Կարապետյանի հուշերի “Նախապապից մինչև ծոռ. Հայրենական մեծ պատերազմի վետերանի ընտանեկան սագա” գրքի շնորհանդեսը։
Ստեղծագործությունը ներառում է պատերազմի տարիների հիշողությունները, որպես ճարտարապետ և շինարար տասնամյակների ստեղծագործական աշխատանքը, ինչպես նաև նրա նախնիների մասին տեղեկություններ, որոնք խորապես կապված են հայ ժողովրդի պատմության ողբերգական էջերի հետ։
Հայաստանում Ռուսաստանի դեսպան Սերգեյ Կոպիրկինը գրքի շնորհանդեսի ընթացքում նշել է, որ այս հրատարակությունը վառ ապացույցն է այն բանի, թե ինչպես անձնական, ընտանեկան պատմության նկատմամբ հոգատար վերաբերմունքը վերաճում է ամբողջ ժողովրդի պատմական հիշողության պահպանման։ «Հրանտ Մելիքսեթովիչը պատկանում է հաղթողների լեգենդար սերնդին, ովքեր ոչ միայն հերոսաբար մարտնչել են Մեծ հայրենականի ճակատներում, այլև միասնաբար վերականգնել են մեր ընդհանուր հայրենիքը։ Եվ մեր սիրելի վետերանի գրքում տեղ գտած փաստերը շատ արժեքավոր են ոչ միայն մեզ, այլև նոր սերունդների համար», – ընդգծել է դեսպանը։
«Դիալոգ» հասարակական-բարեգործական կազմակերպության ղեկավար Յուրի Նավոյանը, ում ջանքերով գիրքը լույս է տեսել, նշել է, որ Հայրենական մեծ պատերազմի հայ վետերանների ստեղծագործությունների հրատարակումն արդեն բարի ավանդույթ է դարձել։ Նա նշել է, որ անցյալ տարի լույս տեսավ 100-ամյա վետերան Լաչին Ստեփանյանի “Իմ ժամանակը, իմ հաղթանակը” բանաստեղծությունների ժողովածուն։ «Իսկ Հրանտ Մելիքսեթովիչի գիրքը ոչ թե, պարզապես, հուշեր կամ ընտանեկան տարեգրություն է, այլ ժամանակի կենդանի պատմություն, որը հազիվ թե կարելի է կարդալ դասագրքերում», – պատմել է Նավոյանը։
Իր հերթին՝ Մարշալ Բաղրամյանի անվան Հայաստանի վետերանների միավորման նախագահ, գնդապետ Սիմոն Եսայանն ընդգծել է, որ գրքի հրատարակումը հարգանքի տուրք է Մեծ հայրենականի վետերաններին՝ ի դեմս Հրանտ Մելիքսեթովիչի, ում սերն ընտանիքի և հայրենիքի հանդեպ պետք է օրինակ ծառայի սերունդների համար։
Գրքի վրա աշխատանքը Հրանտ Մելիքսեթովիչը սկսել է 93 տարեկանում, իսկ վերջակետը դրել է հենց իր 94-ամյակի օրը։ Նրա երեխաներն ու թոռները ոգեշնչել են նրան վեր հանել արխիվները, հին գրառումները, լուսանկարները և վերականգնել տոհմագրությունը։ Հատկանշական է, որ գրքի շապիկը զարդարել է հենց վետերանի նկարած նկարը, որը ստեղծվել է ավելի քան 100 տարի առաջ։
