Վերջին ամիսներին Հայաստանի իշխանությունների կողմից Եկեղեցու և եկեղեցականների թիրախավորմամբ և հետապնդումներով խաթարվել է մեր ազգային և եկեղեցական կյանքը։ Այս մասին հայտարարություն է տարածվել Սրբոց Ղևոնդյանց քահանաների նվիրական տոնի առիթով Մայր Աթոռ Սուրբ Էջմիածնում գումարված քահանայից հավաքի մասնակիցների կողմից։
Հայտարարության մեջ նշվում է, որ Ղևոնդյանց սուրբ նահատակների օրինակը բոլոր ժամանակներում հայ հոգևորականի համար հավատքի և հոգևոր ժառանգության հանդեպ նախանձախդրության, անմնացորդ ծառայության և հայրենյաց սիրո մշտահունչ պատգամ է։ Քահանայական կոչումը պահանջում է պաշտպանել աշխարհասփյուռ մեր ժողովրդի ազգային ու հոգևոր ինքնությունը, դարերով նվիրագործված արժեհամակարգը և հավատավոր մեր զավակների սրտերում անսասան պահելու ազգասիրության և եկեղեցասիրության ոգին։
Ընդգծվում է, որ Առաքելական մեր Սուրբ Եկեղեցին ազգային ինքնության անսասան հիմքն է և հայրենի պետության կայունության ամուր հիմնասյուներից մեկը, որը պետք է պահպանել և զորացնել։
Հայտնի է, որ Հայաստանի իշխանությունները 2025 թվականի մայիսից ակտիվ հակաեկեղեցական քաղաքականություն են ծավալել՝ ձգտելով հասնել Ամենայն հայոց Գարեգին Բ կաթողիկոսի հեռացմանը։ Այս արշավի շրջանակներում հալածանքների են ենթարկվում ինչպես հոգևորականներ, այնպես էլ եկեղեցու օգտին հանդես եկող քաղաքացիներ։ Այսօրվա դրությամբ մտացածին մեղադրանքներով 4 բարձրաստիճան հոգևորականներ հակաեկեղեցական արշավի շրջանակներում գտնվում են բանտերում։ Բացի այդ, Հայաստանի վարչապետը 10 հերձվածող եպիսկոպոսների հետ ստորագրել է փաստաթուղթ՝ Հայոց եկեղեցու, այսպես կոչված, «բարենորոգման» վերաբերյալ։
Հայտարարության հեղինակները կոչ են անում ժողովրդին՝ փորձությունների այս շրջանում աներեր պահել նախնյաց հավատը և փարված մնալ մեր Սուրբ Եկեղեցուն և հայոց հոգևոր կենտրոն Մայր Աթոռ Սուրբ Էջմիածնին՝ միմյանց զորակցությամբ առաջնորդելու հայոց տապանը դեպի ապահով և լուսավոր նավահանգիստ։
Հայտարարության վերջում կատարվում է աղոթք՝ խաղաղության համար աշխարհում, անվտանգության համար հայրենիքում և պայծառության համար Հայաստանյայց Առաքելական Սուրբ Եկեղեցին։
